الشاعر احمد فؤاد نجم ومرثية لجيفارا :

جيفارا مات
جيفارا مات
اخر خبر فى الراديوهات
وفى الكنايس
والجوامع
وفى الحوارى
والشوارع
وع القهاوى وع البارات
جيفارا مات
واتمد حبل الدردشة
والتعليقات
مات المناضل المثال
يا مية خسارة على الرجال
مات الجدع فوق مدفعه جوه الغابات
جسد نضالو بمصرعه
ومن سكات
لا طبالين يفرقعوا
ولا اعلانات
ما رايكم دام عزكم
يا انتيكات
يا غرقانين فى الماكولات
والملبوسات
يادفيانين
ومولعين الدفايات
يا محفلطين يا ملمعين
يا جيمسات
يا بتوع نضال اخر زمن
فى العوامات
ما رايكم دام عزكم
جيفارا مات
لا طنطنة ولا شنشنة
ولا اعلامات ولا استعلامات
عينى عليه ساعة القضا
من غير رفاقو تودعه
يطلع انينه للفضا
يزعق
ولا مين يسمعه
يمكن صرخ من الالم
من لسعة النار فى الحشا
يمكن ضحك
او ابتسم
او ارتعش
او انتشى
يمكن لفظ اخر نفس
كلمة وداع
لجيل الضياع
يمكن وصية
للى حاضنين القضية
فى الصراع
صور كتير ملو الخيال
والف مليون احتمال
لكن اكيد اكيد اكيد
ولا جدال
جيفارا مات موتة رجال
يا شغالين ومحرومين
يا مسلسلين رجلين وراس
خلاص خلاص
مالكوش خلاص
غير بالبنادق والرصاص
دا منطق العصر السعيد
عصر الزنوج والمريكان
الكلمة للنار والحديد
والعدل اخرس او جبان
صرخة جيفارا يا عبيد
فى اى موطن او مكان
مافيش بديل
مافيش مناص
يا تجهزوا جيش الخلاص
يا تقولوا على العالم خلاص